佢哋過往都喺立法會開過餐，但同時亦耗用咗大量嘅發泡膠飯盒、膠杯、膠碗、膠羹同木筷子，既浪費又唔環保，所以佢哋尋日就特別自備咗多個可以循環再用嘅大膠盒，盛載大批越南嘢食嚟立法會，其中林健鋒仲即場用最環保嘅方法，即係用手嚟食。

梁劉柔芬話間越南餐廳係佢老公梁孔德發現，前後食咗十幾年，回歸前後店主移民去美國洛杉磯開業，一樣做到成行成市，佢哋去開當地都有專程去捧場。近年店主回流香港，但冇通知佢哋，佢哋明查暗訪先搵到個地址再次幫襯，認真長情。