煲呔曾顧此失彼，「慳電膽益親家」風波未完，有人又將佢弟婦買雷曼迷債一早獲賠嘅事向傳媒披露。咁多火頭，完全係因為全城線眼不值煲呔曾所為，爭相爆料。點知《壹週刊》無風起浪，不點名話煲呔曾弟婦早獲賠償單嘢，係富貴黨前主席田北俊向傳媒報料。田少尋日發信畀富貴黨常委，鄭重聲明絕無其事。
最新一期《壹週刊》報道，話事前「一名自由黨大佬」聽到立法會議員石禮謙協助煲呔曾弟婦索償一事，又刊登咗田少張相，強烈暗示係佢爆料，仲言之鑿鑿咁話田少咁做，一為報舊仇，二為扶老友。
田少尋日發信畀富貴黨領導、中委同常委，話富貴黨同石禮謙的確間中有飯局聚會，最近亦曾一齊遊黃山，但佢事前從未聽過石禮謙協助煲呔曾弟婦追討雷曼投資產品損失，所以報道完全不符事實，係杜撰同臆測。