伍沾德憶述，五十年代初佢同哥哥喺皇后戲院做經理，經常要帶明星去食西餐，無奈當時比較出名嘅西餐廳都係由外國人開，中國人去親都要坐鄰近廁所嘅位置，受盡歧視，於是佢兩兄弟把心一橫，決定開設西餐廳，為華人出番啖氣。第一間美心係法國餐廳，「high-class」到要着老西打呔至可以幫襯。

由於六十年代文華酒店同希爾頓酒店相繼開幕，美心形勢大不如前，伍沾德於是決定將美心轉型，喺海運大廈開設大眾化嘅「美心茶廳」，及後陸續開設多間中國菜館，將美心嘅餐飲王國推至高峰。