豪宅創天價，惹嚟市民怨聲載道話難以置業，行會成員張炳良一個箭步彈埋嚟倡議復建居屋，一石擊起千重浪，搞到運輸及房屋局局長鄭汝樺要急急腳申明政府反對復建居屋，仲急到亂講一通，話復建居屋無力壓抑樓價。其後行會前成員田北俊亦開聲叫持相反意見嘅行會成員自動收回言論，否則違反集體負責制，好應該執包袱辭職。

正當呢班唱反調嘅行會成員被狂插之際，尋日做班長嘅行政會議召集人CY梁振英出席完嶺南大學學位頒授儀式後，被問到有行會成員唱反調一事，CY毫不猶豫力撐，認為任何政策未經行會拍板之前，行會成員都有自由向外表達任何意見，但對於係咪支持恢復定期賣地同復建居屋，佢就不置可否，認為政府制訂呢類三五七年後先見成效嘅政策時，唔能夠倉卒決定。

之不過，CY力撐張炳等唱反調嘅同僚，某程度等於撐埋「昨日的我」。如果大家仲記得嘅話，CY舊年喺工聯會嘅場合，搶閘支持立法制訂最低工資，隨即引嚟各方炮轟，其中一個有份鬧嘅就係田少，甚至有人話CY違反行會集體負責制原則，當時CY辯解嘅理由同尋日一樣，就係行會一日未拍板，行會成員都有權講嘢。

陳智思呻易講錯嘢

若果CY話張炳等人唔啱，即係承認佢當日嘅做法係錯嘅，所以今次佢一方面力撐行會同僚，但又對同僚發表嘅復建居屋建議不置可否，做法夠晒穩陣。

行會前成員陳智思同CY嘅睇法相同，話行會成員有表達意見嘅權利，但就大呻做行會成員好辛苦，事關好多時唔知行會將會傾乜，當發表咗同政府政策唔一致嘅意見時就會好尷尬，所以行會成員一言一行都要好小心。