樓市跌，已經買樓的第一類人士叫苦連天；樓市升，將要買樓的第二類人士怒火沖天。

鐘擺效應，歷史重演，樓市瘋狂更勝九七。雖然很多第一類人士在樓市高峰期跣到一仆一碌，不過相對而言，負資產遇着杏加橙的一九九七，其實是搵老襯得來又相當穩重的大時代，不似眼下那麼浮誇失實。那時候，呎價不會超越七萬冠絕全球。那時候，牛池灣不會冒認飛鵝山。那時候，四十六層不會自稱八十八樓。

媽媽連聲的發言權又交給無殼蝸牛那一邊，造就了振聾啟聵的第二類人民英雄──許文彪。

許文彪也者，十年前電視劇《創世紀》由陳錦鴻飾演的角色，其中一幕許文彪鬧爆香港畸形樓市的片段，近日在網上火紅熱播。

「你出去問啲人，是但問一個人，問吓佢哋想要啲乜嘢。佢哋答案好簡單，只係想要一間好普通好普通嘅樓。點解佢哋要用成世人嘅時間去供一層樓呀？因為啲有錢佬喺度玩嘢呀！愈有錢就愈有得玩呀！呢個世界公平咩？呢個世界公平咩？」

政府應該聆聽許文彪心聲，出手遏抑樓市嗎？聆聽還聆聽，縮開笨豬手，否則再來一場八萬五浩劫，以呎價七萬接貨的傻瓜第一個跳出來揭竿起義，組織以杏加橙為記的草泥馬大軍，浩浩蕩蕩變身第三類人士：暴民！