立法會尋日辯論施政報告致謝動議，專業會議石禮謙就自嘲係「雷曼石」，話豪宅同上車盤其實好似手袋咁，一定有平貴之分。跟住佢即刻指住同僚余若薇嘅手袋，話呢種袋郁吓都十幾二十萬一個，點知佢轉頭就問坐喺佢隔籬、同係專業會議成員嘅梁美芬借袋，直指佢呢種係廟街貨色，應該好平喎！
梁美芬當場反駁，話自己個袋係喺紐約買嘅，點知雷曼石仲加多腳話個手袋「睇唔到牌子」，似女人街貨色多啲！梁美芬事後就話佢個袋係Tiffany & Fred嘅，雖然唔肯講幾錢，但就話女人手袋起碼幾千蚊喎！
另外，雷曼石又喺會上澄清，佢幫煲呔曾弟婦爭取賠償時冇用特權，仲話將成件事已解釋得好清楚，一定冇嘢再補充嘞，有人要喺雞蛋裏面挑骨頭都冇辦法！嘩，佢態度十足十煲呔曾前日發難渣咁，話兩個人唔係真朋友都冇人信啦！