係人都知食環署轄下公眾街市因為管理不善，好多都被審計署評為「不太興旺」，直接啲講，咪即係十室九空，拍晒烏蠅囉。檔位租唔出，庫房冇錢收，不過有人就攞晒着數。

本報記者早排去旺角街市、油麻地街市同北角渣華道街市睇過，雖然冇乜人氣，但係夠晒「車氣」。多架電單車喺檔位隔籬亂咁泊，有啲更加連行人通道同街市出入口都阻塞埋。最離譜係旺角街市，一個雞檔附近就泊咗四架電單車。除咗電單車，單車同樣係周圍亂泊。

有檔主話到明，將電單車泊喺街市入面，唔止方便送貨，最緊要荷包慳番好多。一來旺角泊車位少，二來泊喺街又要畀錢，泊入街市可以免費，而且入面根本冇人理，有人嘈至多推走架車。

法例早有規定，任何人喺街市內非法佔用檔位或造成障礙，即屬違法，一經定罪，最高罰款五千蚊；如果商戶違例而且被定罪，食環署仲可以中止租約添。法例寫得清清楚楚，但食環署執法是是但但，咁多電單車同單車泊滿街市都唔理，分明係倒納稅人米啫。

叮！香港地少人多，寸金尺土。旺角區租金貴全球有名，但旺角街市檔位大量空置，仲變埋停車場，簡直奇哉怪也。空置率長期高企，唔係市場冇需求，而係食環署管理混亂，導致公帑嚴重浪費。數字顯示，食環署對公眾街市嘅補貼近年不斷增加，淨係○七至○八年度，就增至一億六千萬元。

至弊食環署冇正視問題，仲一味死撐。署長卓永興回應審計署批評嗰陣居然話，使用率冇辦法提升，係因為近年愈來愈多大型超市開業。如果食環署管理得好，使乜驚人哋爭生意吖？本末倒置，推卸責任，不如改姓「賴」啦，笨！

叮！話到尾，公眾街市變成水靜鵝飛嘅「鬧市荒野」，完全係食環署疏於管理，有法唔執所致。依家啲街市除咗變停車場之外，變非法食物製造工場嘅有，變倉庫嘅又有，變網吧嘅都有，總之五花八門。有啲經營多年，署方都唔取締。有市民投訴，佢哋睬都懶得睬，你話有乜辦法唔愈來愈亂吖？

公眾街市年年蝕本，唔係嘞，不如趁樓價飆到發晒癲，將啲「不太興旺」嘅街市拆晒佢，將啲地賣晒佢，一來可以紓緩土地供應緊張，二來可以為庫房帶嚟巨額進帳，總好過納稅人啲血汗錢係咁畀敗家仔揼晒落鹹水海吖。叮！