上個禮拜，慳電膽事件鬧得熱烘烘，全城鬧爆煲呔曾，但鬍鬚曾喺佢嘅網誌上竟然係寫閂埋門玩狗；近日又爆出煲呔曾弟婦買雷曼迷債損手，被質疑獲提早賠償，引發雷曼苦主怒吼，鬍鬚曾作為財金系統最高層官員，不但只冇講過半句降溫嘅說話，喺尋日嘅網誌中竟然講林則徐。

係真o架！鬍鬚曾擺明係幫大佬為呢場禁毒騷敲鑼打鼓，將林則徐嘅「虎門銷煙」同政府嘅禁毒爛騷相提並論，唔通想捧煲呔曾做禁煙英雄？抑或只係幫大佬塗脂抹粉咋？

煲呔曾早前出席一個抗毒活動時好以董太上身咁，董太喺沙士期間叫人洗手、洗手、洗手，煲呔曾則大叫抗毒、抗毒、抗毒，鬍鬚曾就好似林則徐上身咁，話林則徐嘅事業，有佢承傳落去喎。之不過，林則徐有句名句：「壁立千仞，無欲則剛」，煲呔曾如果做到無欲則剛，就冇咁多事搞出嚟啦！