「地下鐵碰着她（他）……」，歌都有得唱，但當喺地下鐵碰着行政會議召集人CY梁振英又點呢？CY前日喺網誌上，轉載一位內地網民「咸方包」喺今年七月二十七號寫嘅網誌，話CY係特區高官，對佢嚟講「遙不可及」，但一次偶然機會畀佢喺港鐵撞到CY，當時列車由中環駛去上環，CY企咗喺「咸方包」對面。
據「咸方包」形容，短短一個站車程中，見到CY拎條深藍色手巾仔出嚟掩住口鼻打乞嗤。一個平凡不過嘅動作，竟然令佢覺得CY洋溢「gentleman（紳士）」氣質，事後感想係「堂堂一個知名人士，坐擁成千上萬甚至過億身家的人，居然坐港鐵」，甚至令佢懷疑嗰位究竟係咪CY。
CY冇講「咸方包」見到嗰位係咪佢，只係話自己經常搭港鐵，都係貪佢快、方便兼環保，只係好多人都唔信啫！CY不妨喺繁忙時間搭多啲港鐵，相信唔使好耐就大把人信佢嘞！