立法會後日開始一連三日辯論施政報告，喺慳電膽益親家同弟婦靠關係搶閘獲賠雷曼迷債一連串醜聞陰霾下，立法會左、中、右陣營都幾乎一致認定，今年嘅致謝議案肯定被否決，即係話，喺過去五年，煲呔曾只有兩次施政報告致謝議案勉強獲通過，成功率唔夠一半，衰過老董。
職工盟李卓人表明上年因為煲呔曾轉軚將生果金加到一千蚊，令部分民主派議員改變主意支持致謝動議，然而今年施政報告爛到透，扶貧措施欠奉，又未有提出遏抑樓市措施，就算煲呔曾今次又臨時轉軚「龜縮」撤回慳電膽政策，佢都唔會支持致謝議案。社民連陳偉業亦叫官員慳番啖口水，唔使向佢拉票，咁渣嘅施政報告，佢點都啃唔落咁話。睇嚟致謝動議嘅結局已定，關鍵只係會唔會打破煲呔曾喺○五年創下嘅二十五張反對票紀錄。
致謝動議唔獲通過咁醜，但煲呔曾都唔緊張，放軟手腳做埋最後嗰兩年，看守政府嘅味道愈嚟愈濃。今次慳電膽事件，唔使立法會通過法例，即係唔使去立法會乞票，致謝動議對政府全無約束性，通過與否，佢都話之你啦。