本文重點
為咗令廣深港高速鐵路工程盡早上馬，政府不惜拋出二十億元天價收地同賠償，「利誘」石崗菜園村居民搬走。雖然運輸及房屋局局長鄭汝樺前日話有三分之二嘅住戶已經考慮接受賠償，聽落好似成效唔錯，但剩低嗰三分之一住戶中，有唔少人堅決死守家園，話到明就算政府賠幾多都「不遷不拆」。有新界王之稱嘅鄉議局主席劉皇發，自從被委入行政會議後，喺新界事務上幫政府拆過幾次彈，而呢次菜園村收地事件亦唔例外，佢一直居中斡旋，但遇到仲有啲村民嘅態度咁強硬，佢有乜嘢法寶呢？
發叔尋日出席鳳園蝴蝶嘉年華時自言從未忘記過菜園村，之後亦會繼續協調、游說，令事件圓滿解決。佢之後仲一輪嘴咁話：「態度強硬都係講道理啫，都冇戰爭咁緊張，攞埋飛機、大炮、飛彈、坦克先可以解決，所以對解決問題好有信心。」
修改白泥發展計劃
Hold住啲飛機、大炮，都係唔想出現官民衝突嘅火爆場面，見佢胸有成竹咁款，唔通已經諗到方法拆局？但佢竟然話：「出年十月先拆，咁長時間，相信要畀啲時間同耐性。」唔通佢想打持久戰，同村民鬥耐性，即係磨爛蓆，磨到班村民態度軟化為止﹖咁就要睇吓邊個夠耐性喇！
既然去睇蝴蝶，發叔當然都講吓啲貼題嘅嘢。其實，發叔舊年計劃喺元朗下白泥興建低密度豪宅、高爾夫球學院，同一個佔地十四萬平方呎嘅蝴蝶公園，但畀環保人士批評破壞大自然，結果項目未上城規會就胎死腹中。
發叔上月修改白泥計劃再戰城規會，將佔地面積大減超過三分一，而項目涉及嘅政府土地，主要為綠化地帶。佢仲喺蝴蝶嘉年華乘機推銷白泥項目，大讚起蝴蝶公園有助環境保育，所以希望政府接受批地申請。