小白觀點：「曾政治家」親疏皆欺

哦，原來煲呔曾細佬個老婆都係雷曼苦主，不過佢條命生得好，有個咁把炮嘅「政治家」照住，可以提早甩難脫苦海，大家唔恨得咁多㗎喇。

不過今次煲呔曾硬食一嘢，又未免有啲冤枉。記唔記得金融海嘯後，好多財金官員彈晒出嚟扮先知，話一早已預計到有此一劫？既然明知出事，煲呔曾都由得佢弟婦買雷曼，證明佢唔會假公濟私，係「親疏皆欺」至真。

話說回來，查實成班苦主眼光認真麻麻，唔單止買錯咗隻雷曼，亦冇帶眼識人，搵咗「雷曼甘」幫佢哋出頭，家陣佢都自身難保，既然石禮謙咁使得，封佢做「雷曼石」好過啦。

網友觀點...X）...

[　Gino　]

好出奇咩，閉門一家親之嘛。

[　傑傑　]

煲呔曾就好啦，一有事就飛去玩，今次聽聞又話去日本睇紅葉，真係人上人。

[　T_T　]

同人唔同命，鬼叫班雷曼苦主冇咁硬嘅後台咩！

[　lo lim　]

唉，小市民不如幫煲呔曾籌定啲咖啡基金啦！

網址：www.sunsiupak.blogspot.com

阿豪觀點：煲呔親坐定定等着數

作為煲呔曾嘅親戚，好處真係數都數唔晒：代理慳電膽嘅可以有生意做；投資時不幸損手，又可以率先有得賠；讀書要考試咩，都唔怕，煲呔曾識得個教授，同佢食餐飯大家聯誼吓，就自然過關啦。

最盞鬼嘅係，「煲呔親」永遠唔使開到聲尋求協助，煲呔曾自然會「不經意」咁向司局長提及，仲會根據廣大市民利益嚟作決定添！照咁講，「煲呔親」不但可以坐定定等收着數，仲可以惠及埋市民，真係一家便宜兩家着！

雖然真正嘅「煲呔親」名額有限，但係市民唔使失望，快快投考警察等紀律部隊，煲呔曾出身「警察世家」，又點會虧待你呢！

網友觀點...X）...

[　周口店　]

開講都話，朝中有人好辦事啦，我哋唔恨得咁多o架喇！

[　匿名　]

搞出咁多大頭佛，睇嚟煲呔曾今次要請拆彈組幫手……

[　連儂　]

會唔會原來煲呔曾個弟婦唔識字，係文盲，銀行先至作出恩恤賠償呀？

[　匿名　]

誅佢九族啦！萬一佢有親戚小學考試唔合格，特首講咗出嚟，孫公應該會將全港小學考試及格分數減到20分。

網址：www.lukchiho.blogspot.com