好多曾經致電政府熱線求助嘅市民都知道，佢哋啲服務只可以用四個字嚟形容，就係「龜速牛步」。政府效率促進組踢爆，熱線效率差主要係因為政府各部門互相推莊，冇人肯孭飛，前線員工又唔配合，連可以即時解決嘅小問題，都要拖一大輪。

例如有人致電1823投訴金山郊野公園有猴子糞便要清理，舉手之勞，本來幾分鐘就可以搞掂，但漁護署、食環署同路政署三個部門就將投訴當波踢，搓嚟搓去，搞足兩三個月至搞清應該由邊個去清理。

叮！小小事都拖幾個月，嚴重嘅咪隨時要等一年半載至有人做嘢？設立熱線嘅原意係方便市民，有問題可以即時處理，點知事與願違，熱線唔熱，市民投訴無門，便民係假，護官、護短就真。

熱線中心平均每日接到約一萬個來電，其中一成係投訴，即係日日都過千單。如果單單投訴都係咁拖，問題仲使解決嘅？唔怪得班公務員愈來愈得閒，市民投訴愈來愈多啦。

拖字訣不過係其中一招咋，仲有賴字訣㗎。嗱，有投訴指路邊一棵大樹過高，遮住附近嘅交通燈，熱線中心轉介市民投訴，叫有關部門剪吓棵樹。前線員工居然回應話，問題喺交通燈度，言下之意同棵樹冇關，結果唔使問，梗係冇咗件事啦。

拖字訣、賴字訣都未掂？咁咪用亂字訣囉。呢招複雜少少，就係用啲九唔搭八、似是而非嘅理由卸膊。嗱，早排有市民投訴香港仔魚市場附近行人天橋底花槽同行人路邊，畀多架滿載發泡膠箱嘅手推車霸住，阻住行人通過。本報致電1823查詢，熱線職員居然咁答：「清潔工人行到入去就歸食環署管，行唔到入去就歸路政署管。」

叮！市民想叫政府處理阻塞行人路問題，邊個部門去做同市民有乜關係？食環署又好，路政署又好，總之快快趣趣搞掂。熱線中心幫唔到市民，反而故布迷魂陣，添煩添亂，幫政府部門做「投訴防火牆」，咁嘅熱線打唔打都罷！

1823熱線開咗八年，市民有彈冇讚，處理投訴嘅熱線居然變咗市民投訴嘅對象，利民變累民，所謂「以民為本」，不過係齋噏啫。叮！