小白觀點：老鼠樂園大鼠幾味自救

新加坡耗資三百四十億港元，喺聖淘沙打造一個環球影城，呢個主題公園有乜嘢玩？多囉，有一個全球最高嘅雙軌式過山車玩，又有瑪麗蓮夢露睇，咁都不特止，聖淘沙有埋海洋生物睇，真係一次過滿足晒幾個唔同願望，實聽打殘香港老鼠樂園都得。

香港呢個主題樂園生意慘淡，根本就係意料之內，香港地環頭環尾都係老鼠，冇理由咁笨，山長水遠畀咁貴嘅入場費去睇㗎！至於啲內地客，直情當老鼠係佳餚美食，試過喺洞庭湖區走咗上億隻老鼠出嚟，當堂畀廣東老饕消化晒，如果樂園餐廳加番幾味紅燒鼠頭、糯米釀老鼠，或者都可以留番住啲客嘅。

網友觀點...X）...

[　波　兒　]

畀我都去新加坡啦，多嘢玩，地方又乾淨，價錢又抵，搭A380唔使二千蚊喎。

[　Keroro　]

香港老鼠樂園都唔好玩嘅，輸晒啦。人哋環球影城幾多嘢玩，有全球最高嘅過山車呀，聽落已經好吸引。

[　Donald duck　]

老鼠樂園多數係大人陪細路仔去玩㗎咋，環球影城就唔同嘞，大人細路都想玩，universal個名國際化幾多。

[　無眼睇　]

香港政府學吓人啦，人哋標個環球影城返嚟，你就整個又細又蝕錢嘅老鼠樂園，點比先得㗎！唉！

網址：www.sunsiupak.blogspot.com

阿豪觀點：「香港片場」猛片多籮籮

全東南亞第一個環球影城將於明年初喺新加坡開幕，日前更嚟香港宣傳搶客添！

豪伯唔知新加坡環球影城係咪以香港為假想敵啦，如果真係嘅話，咁就未免太過不自量力喇。香港本身就係一個大片場啦，要睇鬧劇，我哋現成就有一套《燈膽權與親家》上映緊，新加坡朋友依家買機票趕嚟睇都仲趕得切。驚慄片方面，觀眾更加有眾多選擇，遊客可根據個人口味，選睇《公立醫院輸錯血》/《打錯針》/《割錯乳》等不同劇目。如果鍾意史詩式長篇巨構嘅觀眾，《十大建設興衰史》就啱晒你，包你十年後再睇番，「興」嗰部分都未做完呀！

網友觀點...X）...

[　匿　名　]

香港個迷你米奇樂園，全球最細，好值得參觀，各地元首都會讚嘆點解咁細都可以當景點！

[　伊藤開司　]

好似內地咪有好多微縮景區一類嘅小人國嘅，一於將老鼠樂園包裝成微縮景區啦！

[　廖尚恆　]

香港冇新景點都唔係今日嘅事，但係如果新嘢管理得唔好，都係冇好過有，你睇個ngong ping sam look ling吖！

[　豬標精　]

如果當年真係喺大嶼山開賭場咪好囉，依家肯定大把人爭住嚟香港啦……

網址：www.lukchiho.blogspot.com