近排政府大力推銷電動車，呢瓣係由環境局局長邱騰華孭飛，但佢就潛水，搵咗財爺鬍鬚曾同商務及經濟發展局局長劉吳惠蘭撐場，點知兩人坐完車做完騷又快閃。

跟住追問生產商EuAuto行政總裁鍾倩玲，究竟政府買咗幾多架My Car呢？佢支吾以對，仲倒轉頭叫記者幫吓口叫政府支持港產車，又打比喻話：「有個小朋友做勞作，喺外國得咗獎，作為本地嘅家長係咪要支持吓先！」

事關政府喺推動同引入電動車過程中，試車係用日本出產嘅，邱騰華兩次去日本考察，都係考察當地嘅生產商，之後政府仲話會買多二百架添，仲唔知有冇My Car在內，咁分明係踢走本地薑，捧來路貨啫！難怪My Car高層酸溜溜咁以「阿媽唔幫仔」揶揄當局唔盡責，冇帶頭做榜樣。

之不過，主席孫國華就畀面話政府肯買電動車已經算幫咗忙，起碼有多啲叉電站，對成個行業發展都好嘅！