施政報告大談發展醫療產業，醫院管理局主席胡定旭早排就喺大氣電波度話理應吸引多啲海外頂尖專家來港，建議放寬佢哋嘅註冊關卡，考慮畀佢哋唔使再考牌就可以喺香港行醫。點知呢番說話辣㷫咗出名火爆嘅醫學會前會長蔡堅。
蔡醫生尋日仲趁住醫學會開記招時，攞咗一大堆數據出嚟反駁隔空還擊。佢話本港一直有套針對海外醫生來港執業嘅制度，其中有百幾人喺醫管局工作，唔一定要考牌；另一批就需要向醫委會考牌後先可行醫，咁嘅個案亦有千幾人，根本唔需要額外再諗放唔放寬。佢擔心實情係政府想修改現時制度，借肥胡把口「出口術」。
同場嘅醫學會現任會長謝鴻興亦幫口，話現時制度行之有效，又話港人一直相信制度，就係唔想有人靠關係濫竽充數。今次因為一句說話就搞出咁嘅小風波，睇嚟肥胡都要諗吓點樣氹番蔡醫生先得嘞！