天價豪宅牽引中小型樓價上升，搞到有自稱中產嘅專業人士打上電台話買唔到樓。
早幾日喺中環遇到房協主席楊家聲，佢話香港經濟同樓市有循環周期，有升自然有跌，仲話公營房屋同私樓各佔香港樓市一半市場，私樓市場入面有部分係炒家，當炒家手上物業囤積到某程度時，自然就會將物業出售或放租，樓價自然會調整，到時買樓都未遲，所以毋須喺樓價高峰期買樓。佢話：「千祈唔好因為一時衝動去買啲個人能力未能負擔到嘅樓，否則成世人幫層樓打工，可以選擇暫時租樓住住先。」
話口未完，楊家聲前日出席一個場合後，都係叫市民買樓要量力而為，顧及個人嘅經濟能力。雖然佢講得好有道理，但如果政府一日唔插手穩定樓價，市民係咪唔使旨意買樓呢？抑或學煲呔曾話齋，走去偏遠啲地區買樓？