話說教育局副局長陳維安上場後，一直負責搞電子書，但個報告拖吓又拖吓，前幾日至出台，建議電子教科書五年先可改版一次，跟住引發同書商嘅爭拗，書商還價四年。

同書商討價還價

外界一直質疑政府係咪想開天殺價，等書商落地還錢。陳維安尋日上電台解畫時，唔知主持人係有心定冇意，一開波就好似有骨咁讚佢醒，話五年先改版，等書商話四年。言下之意，似乎係暗寸陳維安耍花招。但陳維安強調唔係討價還價，只係政府原先就諗住係要三年，再考慮到審批內容都要兩年時間，咪將呢兩年加埋入去囉！咁講，即係話佢好直線咁諗，三加二咪等於五囉，冇玩花招。

擴大問責制劣評如潮，但政府繼續背逆民意又益自己友，喺前日委任入境處前處長黎棟國同政務官出身嘅黃靜文，分別出任保安局同政制及內地事務局嘅副局長，畀立法會議員同學者狂批違反吸納政治人才嘅目標，仲會加劇政務官斷層。

到咗節目尾聲，主持人問陳維安有乜貼士畀兩個新人呀？咁即係叫佢畀啲錦囊後來者都不為過吖，點知佢竟然乜貼士都冇，只係話佢哋經驗豐富，歡迎佢哋加入呢個團隊。

吓！陳維安使乜咁驚青呀？咁又好難講嘅，正正因為佢就係喺外面引入嚟嘅人才，點知早前政府呼籲喺豬流感期間停止學校嘅集體活動，偏偏佢太太就要求學校畀佢哋搞私人派對，慶祝個仔小學畢業，被狂轟違反停學令，同政府對着幹。

另外，電子書措施原意係諗住可以令傳統教科書減價，點知到依家陳維安對能否減價仍然哦哦，分分鐘衰收尾。自己都搞到一鑊泡，仲點敢畀貼士啲新副局長吖！費事講多錯多啦！