勞工及福利局局長張建宗即刻出嚟攞彩，話就業市場趨向穩定，唔少老闆願意增聘人手，對失業率帶嚟紓緩作用。

大家係咪好想問，咁家陣失業率到底跌咗幾多個百分點咁巴閉呀？一個百分點？非也！兩個百分點？錯錯錯！嗱，聽清楚喎，原來係比上次跌咗零點一個百分點咁大把，本港七至九月份失業率依然高企喺百分之五點三呀！

叮佢個鎯鎯，跌得嗰雞碎咁多有鬼用咩，失業人數少咗七千幾，但本港失業人口依然超過二十萬。明明失業率依然長期企硬喺高位，只不過係唔再升，張建宗抱住輸少當贏嘅心理，沾沾自喜話勞工市場「初步回穩」喎，好似中咗六合彩咁開心。

知唔知本港貧窮人口有幾多呀？超過一百二十萬，創埋十年新高添，貧窮人口喺半年間比去年急增兩萬幾人呀！冇工做固然苦過弟弟啦，就算有份工做都唔係好得幾多，好多都係餐搵餐食餐餐清嘅在職貧窮，呢類家庭超過十九萬！

再講，打工仔無時無刻要面對裁員、減薪壓力，你估好似公務員咁，逆市都可以嗌加人工咁幸福咩？呢嗱，香港人才管理協會同埋浸會大學訪問過百間本地企業，發現過去一年，六十四間曾經凍薪，八間企業要減薪，四十九間企業甚至曾經裁員。

至於工資方面，本港企業過去一年嘅平均加薪幅度得百分之零點五，係○三年沙士以來最低，由於經濟仍有不明朗因素，預計來年嘅平均加薪幅度，都只係得百分之一點三咋，陰功！

難為前排財爺曾俊華同埋財經事務及庫務局局長陳家強兩個財金官員，一齊唱雙簧話經濟已經露曙光。好心成班高官閂埋門自己呃自己就算，唔好出嚟對市民噏得就噏得唔得？

冇錯，依家嘅樓市同埋股市好似一片暢旺咁款，但呢啲只不過係虛火，點可以當真o架！事實上，成個消費市場依然極之疲弱。嗱嗱嗱，城市大學公布第三季消費者信心指數調查結果，好似一盆冷水淋落班不食人間煙火嘅高官頭上。

調查顯示受訪者嘅整體信心指數雖然比上季輕微升至九十點三分，之不過，仍然係低過一百分嘅水平。由此可見，小市民嘅消費信心依然疲弱，特別對物價狀況以及購買房屋嘅信心指數，更加係連續跌咗兩季！

叮！相信除咗班財金官員唔知之外，係人都知金融海嘯嘅影響仍然未過，弊在特區政府高官淨係識得翹埋手等運到，一味只係吹水講「保就業」，高官唔講到煩，太一叮都聽到厭！

其實睇吓今次份施政報告就知，所謂「保就業」根本就係吹水唔抹嘴。扶貧紓困方面交白卷，只係繼續炒冷飯空談六大產業，幾乎全部都係十畫未有一撇，試問遠水又點救到近火！仲話保就業喎，保就保嘞，不過係保證打工仔嘅悲歌唱極都唱唔完就真！叮！