由於駐京辦有份搵承辦商搞花車，而駐京辦又屬於政制及內地事務局管轄，咁啱尋日局長「林公公」林瑞麟喺立法會簡介施政報告，身兼富貴黨主席嘅議員劉健儀就問佢，出年上海世博嘅香港館都係佢個局搞嘅，會唔會好似花車咁敗筆㗎？

林公公就即刻推波，話駐京辦確實有按合約為花車搵承辦商，但份合約係新聞處負責批出嘅；而上海世博嘅香港館就唔同嘞，先有搞設計比賽，仲有好多設計師做評審，所以佢有信心喎！

咦！林公公話有信心，似乎係寫包單話香港館唔會好似紙紮花車咁渣喎！上次架花車，新聞處事後夠發稿讚到飛起啦，但睇過嘅都噓爆，劣評如潮，所以政府話香港館係「優」質啫，啲議員自然「憂」質啦，驚影衰香港㗎嘛，當然要篤住林公公實啲。