除咗Jeffrey林健鋒同「蘇菲」梁劉柔芬搞爛Gag外，聽聞係搞手嘅「煲呔針」鄭經翰，竟然話班政商界朋友，不時都有搞吓「大食會」聽歌吹水，今年七月內地HiFi歌后陳潔麗來港，佢哋就搞過一次邀請對方到場表演，今個月輪到另一內地歌手童麗來港，加上財爺鬍鬚曾出院同多名老友獲頒紫荊星章等重重喜事，於是就決定搞多次，同煲呔曾結婚四十周年完全無關。
如果餐飯真係咁簡單，點解前晚現場啲賓客全部封晒嘴，到第二日至好似夾晒口供咁，紛紛幫煲呔曾護航解畫呢？簡直係愈描愈黑。
雖然煲呔曾當晚放咗飛機，但佢班「曾朋友」似乎玩得相當盡興，大多飲到滿面通紅，其中滙豐銀行執行董事王冬勝同Jeffrey仲夠膽揸車走。
