滙豐亞太區主席鄭海泉將喺下年二月退下火線，出任滙豐中國董事長同台灣區主席一職，專注中國同台灣業務，以配合愈嚟愈緊密嘅大中華地區經濟發展。鄭大班尋日一支公喺中環食飯，話近日往來北京開始頻密，配合下年二月正式履新，到時會舉家返內地定居都唔出奇，事關太太已答應到內地居住。果然係夫唱婦隨。
以前有人彈過鄭大班嘅「煲冬瓜」唔係好掂，喺內地生活或會有障礙，佢鄭大班就澄清話：「係啲傳媒話我啲普通話唔得之嘛，其實我聽同講都冇問題，完全溝通得到喎！」
北方天氣比香港凍好多，而且當地人鍾意食饅頭，唔知佢準備好未呢？佢好樂觀咁話：「人總要習慣吓嘅，況且內地乜都有得食，生活應該冇問題。」
