施政報告提出活化工廈，好闊綽咁豁免每年過億元嘅工廈改裝費用，於是畀人批評係官商勾結，擺明益班地產商。負責呢瓣嘅發展局局長林鄭月娥尋日喺大氣電波大呻委屈，話當局喺研究活化工廈期間，唔少地產商收到風後，即時向政府施壓，要求唔好推得咁大力度，事關受惠嘅工廈涉及過千幢，擔心將來多咗商廈樓房供應，會拉低晒啲商廈樓價。
有業界人士話，依家有好多工廈已經變身做商廈，未能受惠於新政策之餘，亦要面對將來商廈增加供應帶嚟嘅租金同樓價下調壓力，但有人快樂有人愁，手上有工廈嘅地產商將會受惠於新政策。
該業界人士仲形容，林鄭今次大刀闊斧活化工廈相當之大膽，等於將商廈供求嚟次大洗牌，租開丙級寫字樓嘅租客，將來可能流向租用工廈變身後嘅商廈，租開乙級寫字樓嘅亦可能流向丙級，如此類推。
其實林鄭早前接受訪問提到工廈發展時，已提及希望地產商目光要遠大啲，唔好只顧自己利益，要顧及香港整體發展，點知仲要繼續畀人批評官商勾結，明益地產商，心裏當然不是味兒，不吐不快，但估唔到佢為保清白，不惜擺地產商上枱，仲嚴重到用「施壓」兩個字添！