由於晚宴主角臨時甩底，據聞多名原先答應咗嚟嘅嘉賓，最後都冇現身，令原定嘅七圍枱縮到得番四圍半，其中一圍枱主要係畀負責演唱嘅歌手同樂隊坐嘅，即係實際上出席嘅「曾朋友」估計只有三、四十人。

財爺鬍鬚曾、金管局總裁「攞命陳」陳德霖、「肥龍」許仕仁、「煲呔針」鄭經翰，同只得太太同兩個仔出席嘅東亞銀行主席李國寶，都係公認嘅煲呔曾「真朋友」。立法會議員方面，就只見經濟動力嘅Jeffrey林健鋒、「蘇菲」梁劉柔芬同專業會議嘅「大舊石」石禮謙。

點解請呢三個呢？佢哋不約而同富貴黨有牙齒印喎！尋日仲撞到富貴黨前主席田北俊，問佢有冇去煲呔曾結婚周年紀念晚宴呀？佢話：「冇喎！唔知喎！咁恭喜佢啦！」

傳力撐3L脫離富貴黨

仲記得富貴黨喺舊年立法會選舉直選全軍覆沒，跟住又「家變」，Jeffrey、蘇菲同梁君彥一齊退黨，由3L變成依家嘅經濟動力，當時就有傳聞話係煲呔曾力撐佢哋退黨，以拆散富貴黨，除去田少呢個眼中釘，睇嚟呢個傳聞未必係空穴來風喎！

宴會後Jeffrey同蘇菲仲齊齊搞爛gag，前者話晚宴係慶祝佢五十七歲零三百六十日壽辰，好似驚死人唔知佢就嚟生日咁；後者更自爆同老公今年都係結婚四十周年，前晚亦有人恭喜佢哋。尋日佢哋同傳媒茶敍時，又力撐煲呔曾嘅慳電膽醜聞冇問題，真係夠晒朋友！

除咗呢三個喺議會嘅「真朋友」之外，煲呔針話仲有其他議員喺被邀之列，但唔係個個都得閒嚟，咁即係話，仲有啲「曾朋友」未曝光。