小白觀點 環保團體一樣唔環保

環保團體調查發現，依家啲o靚仔成日換新手機，話咁樣會製造電子垃圾、污染環境喎。呢啲咁嘅調查，真係講都冇人信，查實啲後生仔嘅環保意識仲高過呢班環保先鋒啦，用完你估會隨手掉咗部手機咩，佢哋識得去trade咗去，繼續循環再用㗎嘛。

聽聞有手機廠商出咗部以可分解物料製造嘅手機，環境局局長邱騰華為咗公眾利益，可以向全港青少年大派手機現金券，不過今次要學精啲，記住搵私家偵探查清楚煲呔曾三代先喎。話時話，呢啲環保組織成日花咁多氣力聲嘶力竭咁話人，咪又要食番多啲補充體力、飲番多啲補充水分，虛耗更多地球資源，咁至叫做唔環保呀。

網友觀點...X）...

[　GP　]用手機本身已經係唔環保o架啦，嘥氣！

[　hellboy　]唔好成日靠嚇啦，又唔見佢哋出嚟話特區政府咁多庸官，垃圾成災？

[　邱吉爾　]政府派慳電膽好有遠見，香港個天空成日灰灰黑黑，遲啲日頭都要開燈！

[　kathy　]電話梗係用嚟威㗎啦，電子垃圾關我乜事，我見大陸有好多手機回收再賣嘅生意吖，幾環保呀，叫邱騰華學吓啦，淨係識得叫人買燈膽……

網址：www.sunsiupak.blogspot.com

阿豪觀點 手機主人污染性更甚

本港電子垃圾造成嚴重環境污染問題，但計我話，手機產生嘅有形電子垃圾都係其次，手機主人對環境造成嘅污染，分分鐘仲大過手機本身呀。

大家搭過公共交通工具都知啦，依家啲人好鍾意大大聲講手機，好似慌死人哋唔知佢哋啲私人嘢咁，強姦旁人耳朵當等閒，謝安琪首《私隱線》可說道盡我哋呢班苦主嘅心聲；仲有啲人講嘢大聲到一個地步，直頭要將手機當Walkie Talkie咁用。

講到電子垃圾，起碼環境局都叫做整咗幾架用嚟回收電子產品嘅車吖，但係更加嚴重嘅係「人禍」，佢哋仲識自己上車添，唔知當局又有冇好計解決呢個問題呢？

網友觀點...X）...

[　神經刀　]點解唔將唔要嘅手機、電腦捐畀慈善團體，幫吓有需要嘅人呢？就咁亂掉，好折墮啫……

[　卜勤　]電燈膽環保邏輯：津貼市民買環保手提電話，然後喺佢哋手提電話費度扣番。

[　燈膽權　]電子垃圾多都好嘅，起碼證明我哋香港人有錢吖嘛，唔係點可以換電子產品換得咁密呀？

[　高腰褲　]香港幾乎已經冇晒電子業，但係就有咁多電子垃圾，你話係唔係諷刺吖？

網址：www.lukchiho.blogspot.com