剛剛發表施政報告的曾蔭權作為十大產業總舵主，如無意外應可名垂青史。古有十全老人，今有十碌柱男，煲呔跟乾隆互相輝映也。

噢，且慢，根據歷史學家考證，乾隆大帝自誇自擂的所謂十全武功其實極有吹水嫌疑，而且重重複複，簡直架床疊屋。

十全武功包括：平大小金川，平準噶爾，再平準噶爾，平回部，平緬甸，再平大小金川，平台灣，平安南，平尼泊爾，再平尼泊爾。

三個「再」字已足以顯示乾隆乃數學天才，把同一物件數來數去可以得出不同數目。數口之精，猶如那些分贓不勻的賊阿爸：嗱，呢一份我嘅，呢一份你嘅，呢一份我嘅，呢一份我嘅，呢一份佢嘅，呢一份我嘅……

除了七隻手指數出十隻之外，很多武功更是不盡不實，慘勝又當贏，輸少又當贏。當中以平安南最搞笑，清兵出師的原意是幫A君，打B君，到頭來，B君打贏了清兵，然後要求中國冊封，乾隆居然拋棄A君，改立B君為安南國王，而自己則歡天喜地當作完成了一件超凡入聖的偉大壯舉。

乾隆如此，煲呔如何？按其精甩辮的香港仔性格推測，十碌柱男應該跟十全老人差不多，慘勝又當贏，輸少又當贏，甚至乎，大敗亦當贏。反正都是贏，先擦未來鞋：十碌柱男，十卜十卜！