小說《西遊記》個水簾洞人人都識，話說當年孫悟空一嘢跳入花果山瀑布後個大窿，發現裏面有橋有屋、有花有樹、有石床石枱石櫈石碗，仲有一塊大大嘅石碑，雕住「花果山福地，水簾洞洞天」。自從《西遊記》面世後，啲人為咗吸引遊客，就將各地水後有洞嘅景點改晒名做「水簾洞」，正版位處江蘇連雲港市花果山，翻版遍布全國各地，太一叮細時最鍾意去鳳德公園水簾洞玩，雖然係人造，但係都好別致、好過癮㗎。
之不過，太一叮近期發現，原來西環德輔道西都有個水簾洞喎。事關嗰度有棟叫做「創業中心」嘅東東，表面上係一棟普普通通嘅商住大廈，樓上住咗五百戶人家，而故事嘅離奇之處在於，當你行入大廈嘅地下同地庫，裏面竟然別有洞天，個地庫有成兩米深嘅積水，成個另類水簾洞咁。
景點水簾洞就引人入勝，大廈水簾洞就聞所未聞，到底個地庫點解好地地會變咗水簾洞呢？講起嚟又有段古。話說個大廈地下同地庫本來預留畀港鐵起西港島線車站嘅出入口，業權屬於政府，但係西港島線後來改線，預留嘅空間除咗被丟空之外，仲嚴重滲水。
結果，啲住戶恨唔到個港鐵站，反而變咗「水上人家」。大廈法團主席話，其實滲水現象早喺○三年已發生，多年來不但搞到蚊蟲孳生，每隔三個月啲水仲會浸晒成個地庫，需要定期將積水泵入街井排走，認真麻煩。
冤有頭，債有主。正如有立法會議員話齋：「如果當初唔係要起港鐵站，根本唔會發生呢件事。」於是乎，啲居民就搵政府，叫佢哋執番手尾。殊不知，產業署一口反咬，話經過建築署查證，積水問題係由大廈地基嘅防水層滲漏造成嘅，大廈法團有責任維修，佢哋仲發信「強烈勸喻」法團修妥滲漏地方，「否則產業署將考慮採取法律行動」。
大廈業主立案法團圍埋一計，發現維修大廈地基防水層嘅費用可能超過一百萬元。佢哋對此大為不滿，批評產業署既話維修責任歸於法團，又死都唔肯提供檢測報告，等於「大石砸死蟹」。
叮！法團政府各執一詞、是非莫辨，其實解決辦法好簡單，就係由產業署攞番張檢測報告出嚟，同啲居民講清講楚、計清條數。點知佢哋將個報告收收埋埋，無根無據就要啲住戶硬啃成百萬維修費，簡直就係酷吏欺民！
叮！死得你個產業署署長郭家強啊，家陣香港紛爭不斷，已經係多事之秋，你仲要將啲居民砸成死蟹，逼到人哋醞釀上街。再咁落去，社會都幾難有河蟹咯！