依家已經冇乜男議員敢明刀明槍撐甘威，咁呢三個係乜水？咪就係「IQ博士」黃宜弘、富貴黨嘅「肥仔張」張宇人，同埋之前話過「表示傾慕」冇罪嘅廠商會代表林大輝。

點知細問之下，IQ博士同肥仔張竟然係填錯表，報錯名梗係快閃啦！咁即係話佢兩個根本冇心加入呢個委員會，亦冇心要撐甘威。以為剩低嘅大輝夠抵諗啦，點知佢話入小組委員會只係有興趣了解吓程序喎。原來都唔係撐甘威。

截至尋晚六點，總共有七個議員參加，佢哋包括吳靄儀、劉健儀、梁美芬、梁劉柔芬、梁家傑、林大輝同葉國謙。聽聞專業會議嘅梁美芬有意爭取做調查委員會主席，仲記得有處理性騷擾經驗嘅梁美芬講過，一個眼神都可能中招。以甘威曾經向女事主表示好感嘅情況嚟講，若果梁美芬真係做咗主席，一句講晒：大鑊！甘威都係自求多福喇！