建制派揀喺尋晚聽完施政報告後第二次聚餐，諗住人齊腳啲，但到開飯人腳仍未齊，得二十七人出席。《通勝》都話尋日諸事不宜㗎啦，包括宴會。
飯局上雖然冇再提施政報告，但講起社民連朝早出玩具蕉掟紙板掟中立法會主席，大家都話比上次「飛蕉」更過分，要聯手還以顏色。席間亦有人講起甘威事件，有人主張徹查，畀公眾一個交代，亦有人認為事件冇原告，唔知點查。有份食飯嘅黃國健話彼此仍處於磨合期，相信食多幾次飯後會建立互信。
據聞席間都有傾政改，但就同意等政府公布政改諮詢後再坐埋具體傾，佢哋仲約定十一月二十七號再開飯。計計數，煲呔曾嘅政改諮詢報告將喺十一月出爐，建制派揀月尾食飯，唔通意味份政改報告會喺嗰個禮拜推出？