既然咁悶，不如講吓英國機場近日宣布試用X光全身掃描機啦，連旅客有冇隆胸或裝義肢都一清二楚，大家當堂醒晒。行政會議成員阿Ron夏佳理（圖）自爆分別畀香港、德國同美國嘅海關搜過身，最激嗰次係八十年代去德國公幹，無端端畀海關請佢入房除晒衫搜身，剩番一條底橫。

為乜咁緊張？原來當年德國嘅恐怖活動極之活躍，阿Ron嘅混血兒面孔分外惹人注目，但佢對英國引入無所遁形式X光機唔抗拒，笑言去嗰度搵番份工做都唔錯噃。