煲呔曾尋日份施政報告嘅主題係威係勢，叫做「群策創新天」，但實際內容空洞無物，唯一多到滿瀉嘅，就係啲勁肉酸又冇內容嘅煲呔曾式口號，好似「做好呢份工」、「穩金融、撐企業、保就業」同硬銷「進步發展觀」等。

除咗喺談及發展同保育政策時引用「進步發展觀」，佢連講社福同抗毒政策時，亦用咗「進步社會」嚟做分目標題，認真無厘頭。究竟佢嘅抗毒措施有幾進步呢？原來唯一一項所謂新建議，就係引入好多海外國家已應用多年嘅頭髮驗毒技術，好似當全港市民都冇睇新聞，冇留意日本女星酒井法子逃避頭髮驗毒嘅消息咁。

佢喺報告結語中，提到任期已過咗接近一半，聲稱佢競選時提出嘅大部分重要政策承諾都已落實或即將推出，又強調香港先後度過咗幾個突發事故同挑戰，好似寫緊份中期考勤報告畀中央睇，哀求領導人畀佢好頭好尾做埋餘下任期咁，唔怪得之用咗咁多內地術語同政治口號啦！

泛民嚇鬼行動降呢

其後佢喺記者會上又硬銷佢最近三份施政報告主題都有個「新」字，凸顯政府需要有新思維同創意，但旋即就畀記者踢爆佢今年份報告毫無新意，好多措施建議都係隔夜冷飯炒埋一碟。其實香港市民都希望煲呔曾少喊口號、多做實事。

值得一提嘅係泛民自亂陣腳行動，嚇煲呔曾嘅集體行動「降呢」，令佢好快又忍唔住爆肚窒人，聲稱其中一句英文標語「BOWTIE KEEP YOUR ELECTION PROMISE 」（煲呔曾你要遵守選舉承諾）文法出錯，應該用「KEEPS」先啱，即係喺「KEEP」後面加個「S」。但會後多名出名英文好嘅議員，都話出錯嘅其實係煲呔曾，質疑佢心魔作祟、自暴其短。