小白觀點:妖獸都市嘅縮影
港鐵活板入閘機周不時夾傷細路,「閘口」變「鍘口」,各位男士過閘時都要打醒十二分精神,莫怪鍘口對小弟弟無情呀。查實港鐵陷阱又點止呢樣吖,有婦女團體訪問過千幾名女生,三分一人試過喺公共交通工具畀人偷拍非禮,最高危嘅係港鐵,佔咗七成有多,睇嚟改名叫「狼鐵」比較貼切啲。
兩鐵合併之後故障多過乜,成日行吓停吓,完全冇照顧索K乘客嘅生理需要。仲有呀,香港人一入車廂即刻拎手提電話出嚟大聲講,明明係手機,當正Walkie talkie咁用;有啲索性電話都唔用,企喺度自說自話傻笑。港鐵車廂幾乎係一個妖獸都市嘅縮影,更心智健全嘅人,坐得多都心理變態。
網友觀點......
可兒
返工放工都搭港鐵,陷阱多到暈,入閘口梗有一部係失靈嘅,列車服務一定有受阻。
Niki
繁忙時間成日閂咗幾條扶手電梯,要人行樓梯,你話着住高踭鞋幾咁辛苦吖,唔仆死都算大命。
馬騮精
車廂又嘈又多人食嘢,有次見嗰啲個人遊仲踎喺地下添呀,一煞車咪轆過嚟囉,連sorry都無聲呀。
Ariel
搭港鐵女仔就最蝕底,逼車嘅時候真係冇得避,只係希望好彩唔好遇到色狼。
網址:www.sunsiupak.blogspot.com
阿豪觀點:細路練跳遠勝地
港鐵陷阱多,對小朋友嚟講更係龍潭虎穴。
就以活板入閘機為例吖,多次發生拍親細路嘅事件,港鐵竟然解釋係因為小朋友太矮,個閘機感應唔到有人。咁講即係分明當人冇到啫,咁點解仲要人買飛呢?就算順利入到閘,去到一啲未有幕門嘅港鐵站,一樣咁危險,睇怕除咗等父母可以畀細路喺列車未埋站前「屙殊殊」,仲可以等列車埋站之後,畀小朋友練習跳遠項目—你知啦,有啲港鐵站個月台空隙,仲闊過藝人「大口青」個口,小朋友細個經常練習上車,大個咗分分鐘可以代表香港參加奧運。
下次小朋友曳曳,父母只要講一句「帶你搭港鐵」,包保聽教聽話。
網友觀點......
黎安
試過有一次前面個乘客拍完八達通過咗閘,我跟佢尾拍完八達通竟然過唔到,幾麻煩呀!
Miss Chan Chan
港鐵梗係多陷阱啦!你睇吓嗰啲未安裝月台幕門的月台就知啦,仲係大型嗰隻添呀!
廖尚恒
最慘係,港鐵喺咁多種公共交通工具嚟講,算係唔錯o架喇,估唔到依家都搞成咁……
傻仔
啲班次愈嚟愈多延誤,咁都話好?唔係吖嘛!乜都冇要求,社會點會有進步o架?
網址:www.lukchiho.blogspot.com