問題係，現實生活中邊有咁純情嘅後生仔女吖，垃圾蟲反而周街都係，有時更會對清潔工友冷嘲熱諷添呀。

話說日前中秋佳節，多個郊野公園燒烤區變成垃圾場，粗略估計垃圾數量比去年同期增加兩至三成。有清潔工人好心向市民派膠袋收集垃圾，希望佢哋既唔會整污糟地方，又方便清潔工友處理，你好我好，何樂而不為呢？

點知竟然有青年人唔領情，仲出言不遜話：「我哋唔將垃圾掟落地，你哋邊度有工開！」聽到呢番話，工友都覺得好無奈：「我哋都係為市民服務啫，但對方當我哋唔係人！」

唉，何止工友覺得無奈，太一叮聽到都好難過。真係世風日下，點解依家時代愈進步，公民意識愈來愈差呢？香港人嘅公德心幾時開始淪喪到咁嘅田地呀？

教育評議會主席何漢權講得啱，佢話事件反映咗家陣集體價值觀愈來愈薄弱，當局近年只係集中喺國民教育宣傳上面，係時候要審視基本個人德育以及團體之間嘅價值教育。

新一代嘅集體價值觀有幾薄弱，由各個熱門賞月熱點都堆滿晒垃圾，已經可以知道一二。本報記者去多個熱門賞月郊野公園睇過，得人驚咯，燒烤叉、食物殘渣、紙杯紙碟到處都係，枱、櫈以及台階周圍都留低咗煲蠟痕迹，連涼亭邊嘅石櫈都熏黑埋，直情好似打完仗咁。

漁護署暫時未統計出郊野公園收集到嘅垃圾數量。但據康文署資料顯示，中秋期間一共發出超過一千一百四十幾宗煲蠟警告，收集到超過八十六噸垃圾。呢啲咁冇公德心嘅垃圾蟲，唔單止要清潔工友執到唔停手，仲搞到好多市民被迫喺垃圾崗賞月度中秋，簡直就係累街坊！

叮佢個鎯鎯，當局明知中秋係大時大節，而且幾乎年年都喺節日後收集到數以十噸計嘅垃圾㗎啦，點解仍然咁後知後覺，冇事先做好廣泛宣傳，呼籲市民自己將垃圾帶走呢？好明顯，就係呢班懶官敏感度唔夠啦，搞到周圍污糟邋遢，仲空談乜嘢環保吖。

事實上，單靠嗰啲Hip-hop宣傳片有鬼用咩，邊度會有青少年睇完呢套片之後就立即「全城動」清潔打掃吖？佢哋出少一句聲單打清潔工友已經偷笑啦。正所謂治亂世用重典，其實只要加強執法，喺節日期間加派人手巡邏，即時檢控煲蠟行為以及垃圾蟲，等佢哋唔好心存僥倖，以為隨地掟垃圾係冇人拉嘅，自自然然收到阻嚇作用啦！

唔好話太一叮唔警告一聲，再係咁縱容垃圾蟲，香港變成臭港，世界各地旅客當然請都唔嚟，之不過，各種古靈精怪嘅惡菌病毒就Happy到暈，肯定爭住入嚟添。