小白觀點：積沙成塔打造奇迹

鹿頸一片濕地突然變成四米高嘅小山丘，古有愚公移山填海，依家有衰公沙礫填濕地！

不過，環保團體唔好郁啲就拋個「保育」出嚟無限上綱，嗰度唔係中華鱘嘅故鄉，又唔見有大熊貓等運到，有乜好保育吖！

呢嗱，漁護署署長黃志光日前竟然着條孖煙囱去行山，當然針到一腳都係啦！呢件事除咗反映出普遍高官智力低之外，亦證明香港蚊患嚴重，有人肯唔收錢填咗個濕地防止積水，食環署嘅大蛇可以提早冬眠。

反正依家特區政府想搞生態旅遊，得個畀蟲蛀到甩皮甩骨嘅心經簡林，真係失禮晒啲專程嚟香港睇人文景觀嘅旅客，不如鼓勵多啲地盤工友積沙成塔，打造出一個「鹿頸金字塔」世界奇迹好過啦！

網友觀點......

華姐

邊啲人咁衰破壞自然環境呀！真係冇公德心呀！

威威

鹿頸係一處好靚嘅地方，一定要保護，政府要阻止鹿頸遭受破壞，日夜守住，捉晒班人啦！

Jack

香港保育生態環境已經買少見少，破壞者要嚴罰，坐監罰款，點會話捉唔到阻止唔到吖！

偉華

香港人真係冇公德，香港人咁嘅素質點保育吖！

網址：www.sunsiupak.blogspot.com

阿豪觀點：地盤趕工反映經濟回春

本港生態保育重地之一嘅鹿頸，最近畀人利用作非法傾倒地盤建築廢料嘅場地，綠草如茵嘅濕地慘變「垃圾堆填區」，環保人士見到真係欲哭無淚。

依家傷害已經造成，就算掟西瓜落海都未必可以嗌得番個濕地返嚟。大家不如諗吓，除咗鹿頸變身堆填區外，上水河上鄉一幅菜田都試過畀人非法傾倒建築廢料啦，足以證明本港經濟回春，有唔少地盤正十萬火急咁趕工，如果唔係，點解連行遠少少合法傾倒廢料都唔得閒呢？

不過都係算罷啦，嗌得番個濕地返嚟咁又點吖，政府推廣綠色旅遊闊佬懶理，乜嘢配套設施都冇，唔使講其他吖，好多行山地點連九九九都打唔通呀。個濕地擺喺度都係嘥晒，唔慌會益到市民多個郊遊地方啦。

網友觀點......

謝康

香港人傳統精神—各家自掃門前垃圾，哪管他人瓦上堆填。一直都冇期望！

沉睡的巨龍

講起非法傾倒垃圾，上次有人倒垃圾落民居度，結果政府要受害居民自己搞番掂，簡直離晒譜啦！

普通香港人

咩鹿頸鵝頸，我聽都未聽過，總之唔好喺我屋企附近起堆填區或垃圾站，影響我單位樓價就得嘞！

正常香港人

強烈抗議樓上自命代表香港核心價值，如果人人學似你咁樣，香港唔使旨意有進步啦！

網址：www.lukchiho.blogspot.com