去北京出席建國六十周年慶典前，全國人大常委范徐麗泰嘅囡囡范凌華同女婿Alex掏荷包，請佢同姑仔范尚霞去日本北海道過生日，此行佢哋有睇薰衣草、歎溫泉，同品嘗黑毛和牛嘅最高品牌山形牛。潮流興自拍遊，范太自備相機，將日本美景盡收鏡頭之內，點知到旅程結束，范太開番相機一睇，全部相片竟然唔見晒，非常詭異。
范太猛然醒起，上次去埃及旅行又係用同一部相機，啲相又係不翼而飛，相當邪門。佢話兩次影相操作都同以前冇分別，相機冇被其他人掂過，亦肯定冇唔小心刪除相片，但啲相「自動」消失，真係講都冇人信。好彩佢囡囡都有影相，佢先至唔使靠記憶回味旅程。
