本文重點
煲呔曾搵班副局長同政治助理孖咇落十八區就施政報告做地區諮詢，擺明搵佢哋做爛頭蟀，畀市民鬧鑊甘做出氣袋，咪以為諮詢會做完就甩難呀！
話說立法會議員李慧琼尋日喺選區地頭深水埗西九龍中心搞咗個烹飪比賽，請嚟教育局政治助理Jeremy楊哲安煮番兩味，而肥媽就做嘉賓評判。
爛頭蟀又捱悶棍
李慧琼自嘲係「無飯主婦」，遇着只識炒菜同炒飯嘅Jeremy，真係海軍鬥水兵。負責煮酸菜魚湯浸鱸魚片嘅Jeremy煮得最慢，眼見其他人都收晒爐等開飯，佢依然滋油淡定咁繼續切菜，肥媽睇見都唔抵得頸，暗寸佢話：「嘩，你煮得咁慢，似足政府做嘢咁慢慢嚟噃。」
勢估唔到連煮餸都畀人入到位，Jeremy又做咗爛頭蟀，硬食咗一棍！但佢不甘示弱，笑騎騎咁反駁話：「我慢工出細貨嘛！」比賽最後冇分勝負。
講起入廚心得，娶咗個明星太太張燊悅嘅Jeremy相當幸福，話每晚都有住家飯食。