健康快車尋晚舉行慈善音樂會，好多城中名人都嚟撐場。見到早前上京曬到塊面紅卜卜嘅保安局局長李少光，第一時間恭喜佢就快做爺爺，佢顯得有啲愕然，繼而笑住承認新抱的確係今日剖腹生BB，至於幾點生、係男孫定女孫？佢就賣關子唔講嘞。佢又否認新抱剖腹產子係為咗擇吉時，笑言如果真係揀吉日，早就揀咗十月一號喎！
問佢心情係咪好緊張，佢開玩笑話：「又唔係我生仔，點會緊張？」不過佢太太尋晚冇陪老公出席音樂會，擺明係為就快抱孫張羅。會送乜禮物獎勵新抱呀？佢話：「送禮？我連個仔都送埋畀佢喎！」但話口未完，佢話禮物一定會送，就係賜孫仔一個好名嘞。佢決定親自出馬為個孫改中文名，英文名就留番囝囝李霖恩兩公婆改。到底中文名係乜？佢暫時唔講住。