謝署長話喺香港搞騎射培訓有好大局限，但北京就好唔同，淨係馬場都有六十個，所以佢一見前國家射箭隊總教練徐開才喺北京市搞咗個居鞍弓社，佢就義務幫手做安全顧問。佢下月頭會喺居鞍弓社搞兩日一夜嘅訓練營，學員除咗要年滿十八歲，仲一定要熟悉騎馬，「入場」都幾嚴格。

玩騎射咁多年，有乜趣事呀？佢話前年參加青海嘅騎射比賽，當日匹馬野性難馴，連佢咁有經驗都搞到喺馬背上跌落地，但佢處變不驚，第一時間以標準嘅步驟落馬，先喺地下打咗個觔斗再企番起身。點知佢企起身後聽到掌聲，原來觀眾以為上述情節係表演項目之一，搞到佢哭笑不得。