李國寶喺立法會開會，「三點不露」嘅外號街知巷聞，而立法會議員天主教監察組年年發表報告，佢都係「男蛇王」組合嘅鐵膽角色，而尋日佢再度上榜。

監察組尋日發表最新報告，特別指出對議員唔投票情況十分關注，而李國寶就係其中表表者，喺一百一十二次記名投票中，竟然有九十三次不投票紀錄，令人遺憾。同時，過去一年，有五位議員全年都冇提出過任何動議同修正案，李國寶又係其中一個，其他四個係劉皇發、霍震霆、黃國健同詹培忠。報告話劉皇發自九七年特區成立以嚟，係唯一從未提出過任何動議嘅議員。

不約而同，新力量網絡尋日發表立法會議決分析報告，其中新任議員同資深議員比較一欄，亦顯示李國寶缺席投票達七十五次，缺席投票率達八成二。雖然兩個調查嘅結果有啲出入，但佢總之就係六十名議員中最離譜嘅一個，連議會新丁都不如。其他缺席投票較多嘅議員，有「法律超人」謝偉俊同「怪醫」梁家騮，各達六成。

其實，李國寶唔止袋公帑蛇王蛇到出晒名，民間監察組織更加將佢列入「打蛇」目標之一，但佢似足軟皮蛇，年年蛇王年年鬧，批評當係耳邊風，如有立法會蛇王錦標賽，佢肯定夠資格攞終身成就大獎！