六大優勢產業當中，包括咗教育產業，煲呔曾嘅最高層智囊團—行政會議，早前就有人出嚟唱反調，身兼教育學院院長嘅張炳良強調香港唔一定要將教育產業化，應該強化教育質素，配合提升高等教育整體嘅發展，令香港成為教育樞紐咁話。

過往就算係行會拍咗板嘅嘢，都有啲行會成員出嚟唱反調，當行會集體負責制冇到咁，呢啲情況都見怪不怪咯，何況施政報告唔使行會拍板，只係公布前知會吓佢哋，所以行會成員更加可以百花齊放，想噏乜就噏乜。唔知係咪見到有同僚對推動教育產業出現分歧，中大校長劉遵義尋日就出嚟搞平衡。劉校長既係行會成員，亦係經機會成員，仲大力倡議要搞教育產業添，咁佢梗係緊張好多啦，容乜易胎死腹中㗎！

促倍增內地生名額

尋日佢接受某電台訪問時就話，日本、韓國同台灣嘅大學生入學率有百分之七十或以上，但香港只有百分之十八，存在好大差距，而呢啲地方嘅大學都有長遠嘅歷史，有啲甚至係國際學府添！

呢堆數字好明顯就係話香港遠遠落後於鄰近地區啦！劉校長話香港大學生嘅入學率實在太低，最少應該提升到百分之三十，所以香港需要私立大學係前提；香港嘅大學每年收一千五百個內地生，依家收多一千五百個都唔算多，尤其係好嘅人才。

老實講，政府話要將香港變成教育樞紐，但都係得個講字，言下之意，劉校長係嫌政府搞私立大學嘅進度好似烏龜咁慢。再聽真啲，劉校長話大學生入學率最少要提升到百分之三十，而收內地生名額就應該增加一倍，即係話劉校長喺度鞭策緊政府，唔該煲呔曾大刀闊斧啲，追番啲距離，咪畀人哋拋離咁遠先得㗎！