商務及經濟發展局局長劉吳惠蘭話，香港有優良嘅行山徑同配套設施，有利推廣綠色旅遊喎。佢今次就講得冇錯啦，香港係有足夠條件推廣綠色旅遊，問題係政府識唔識做啫。事實上，綠色旅遊唔止有益身心健康，仲可以推動整體旅遊業發展，創造就業機會添。就講台灣吖，每逢假日，鬧市區反而唔覺人頭湧湧，無他嘅，好多人都一家大細去郊外享受大自然啦。

睇番香港人就慘咯，居住環境狹窄唔在講，難得放假想輕鬆吓，但諗爆頭都諗唔到有邊度好去，焗住喺人多擠迫、空氣渾濁嘅鬧市區，行街、睇戲、食飯三幅被。

其實香港四面環海，有山有水，風景比周邊地區絕對唔遜色。淨係離島已經有超過兩百個，海灣同海灘唔止可以暢泳，仲可以變成水上活動同度假村，對外地旅客同本港市民都有吸引力。有台灣旅行社估計，搞香港遠足團可增加兩成營業額。

風景這邊獨好，可惜政府睇唔到。面對優質天然旅遊資源，又有市場需求，搞綠色旅遊簡直水到渠成。弊在政府嘅配套安排遠遠跟唔上，次次都要旅遊業嗌救命，至推出三幾項唔湯唔水嘅措施應急，但每次都係虎頭蛇尾，最終不了了之。

好似○三年沙士肆虐香港，本地旅行社叫苦連天，政府協助業界開辦離島一日遊。初時大家都覺得新鮮，碼頭人頭湧湧，但入到去至發現根本冇嘢好玩，唔止旅遊設施陳舊，連人影都唔多隻，悶到抽筋，離島遊卒之無疾而終。

仲有嗰條計劃貫通新界東北同西北、由馬鞍山到屯門嘅單車徑，七年前已經有人提出，但政府議而不決，一直冇聲氣，搞到條單車徑十足斷橛禾蟲，呢度一截，嗰度一截，仲不時人車爭路，險象環生。前幾個月政府終於姍姍來遲拍板，但至少要二○一四年至成事，等得嚟蚊都瞓啦。

講番行山吖，原來本港好多熱門行山地點係手機盲點，有啲地方甚至連九九九都打唔出，其中有段屬四星級難行嘅路段，居然出現共長四公里嘅盲點，行山客如果有乜冬瓜豆腐，叫天不應，叫地不聞，咁又點樣推廣綠色旅遊吖！

今年十一黃金周首日訪港內地客人數比舊年同期跌咗百分之五，一啲都唔奇，內地旅客好多都嚟過香港，景點熟口熟面，係人都厭啦。政府撐旅遊淨係識吹水，唔搞好配套設施，再多天然旅遊資源都冇用啦。綠色旅遊？吹水就易，叮！