官場靚太馮程淑儀（Betty）轉職康樂及文化事務署署長後，唔使再全天候預備當值，有多啲時間回歸家庭，不過，城中盛事東亞運仲有兩個月就殺到，香江卻靜英英一片，立法會議員同體育界都轟港府冇認真宣傳。催谷同搞㷫東亞運係Betty轉職之後首個大挑戰，佢尋日出席一個活動後，宣布嚟緊兩個月將會推出密集式宣傳活動，唔知佢會唔會瞓身到親自上陣、扮成吉祥物呢？
Betty尋日出席將軍澳區舉行嘅十．一及迎接東亞運動會活動後透露，嚟緊兩個月，政府會開展連串宣傳大計，除咗一早安排喺學校傳火炬外，十月中就會敲定同公布有邊啲運動員會嚟香港參賽，佢估計到時會喺社區掀起東亞運嘅高潮。佢好明顯暗示有唔少星級運動員會嚟香港參賽，至於有邊個，梗係唔會咁早講啦，但就引起市民關注先。
除咗運動員之外，佢透露仲會陸續宣布禮儀小姐嘅服飾同獎牌設計，呢招好明顯係向舊年京奧抄橋，以增加東亞運見報機會。Betty喺政府做過多個職位，近年喺數碼港同新聞處嘅其中一個主力工作就係推廣，今次喺東亞運動會籌備時間尾段先加入衝刺，靚太真係唔易做o架！