港府成日被轟做嘢貴夾唔抵，最新例子係喺北京舉行嘅建國六十周年慶典花車巡遊，香港架花車耗資三百幾萬元，但出嚟嘅效果卻好似紙紮咁，仲比唔少內地花車遜色添！負責籌劃嘅政制及內地事務局局長林瑞麟尋日出席活動時被問到呢件事，佢嘅回應九唔搭八；民政事務局副局長許曉暉就更高招，同佢講花車，佢竟然叫你睇花燈。
林公公尋日話，本港已經搵咗兩位知名導演為花車拍片，拍得好靚。呢個回應真係九唔搭八，外界係批評香港架花車設計唔掂、外觀唔靚兼夾造價太貴噃！佢呢個回答算乜嘢呢？
跟住我哋又問吓許曉暉，佢索性當聽唔到，仲同我哋話，夜晚記得去維園睇花燈會喎。吓！搵花燈為花車遮醜？唔係吖嘛！