十．一活動不絕，香港青年聯會尋日都有連場活動，現任主席陳仲尼（Rock）、上任主席許華傑同曾智雄都有現身，阿Rock嘅哥哥、生產力促進局主席陳鎮仁同班老爺車發燒友，更班到二十部名貴老爺車到場打氣，義載嘉賓巡遊。阿Rock話哥哥由細到大都咁錫佢，尋日係最佳證明。
尋日嘅活動既有一幅好大嘅五星旗（長九十米，闊六十米，重八百公斤），又有好多老爺車撐場。玩咗十幾年老爺車嘅陳鎮仁同阿Rock都係大興紡織創辦人陳元鉅嘅仔，兩人平時各有各忙，鮮有出席同一場合，今次中秋節咁樣「團圓」都好少有。陳鎮仁尋日揸住一架價值不菲嘅私伙英國Daimler老爺車到場，呢架車以前係港督座駕，回歸後，陳鎮仁喺劏車場買嚟翻新，變咗佢嘅心頭好。