中秋正日，一眾高官出席旅遊發展局搞嘅遠足導賞團，希望推廣本地嘅遠足旅遊，不過有份做推銷員嘅漁農及自然護理署署長黃志光好瘀皮，事關佢着咗條短褲到場，睇就涼爽兼舒服，但行山老手都知道，着短褲上山等於做餓蚊大餐。
平日着慣西裝坐慣冷氣房嘅黃志光尋日都算好有準備，着對行山鞋、帶埋支拐杖，好似好專業咁，點知商務及經濟發展局局長劉吳惠蘭（Rita）一見佢嘅裝扮，就笑佢着條短褲行山，肯定會畀蚊針死，搞到黃志光一臉尷尬。
Rita之後仲教黃志光睇由漁護署管理嘅郊野公園地圖，呢個漁護署署長真係羞家啦。Rita可以反客為主，皆因每個禮拜都有行山健身減壓，而且次次都行足全程，所以經驗老到。同一場合仲有旅發局主席田北俊，佢自言成日都有坐遊艇去西沙灣、斬竹灣一帶行山，但最多都係行到一粒鐘，之後就會上番遊艇對住個無敵海景食早餐，認真識歎。