最低工資立法係影響本港競爭力同勞工福祉嘅重大議題，嚟緊禮拜三，立法會將就最低工資立法舉行公聽會，工商界同勞工界都做好準備大鬥法。最新消息顯示，工商界方面淨係飲食同航運界已分拆成六、七個團體提意見；勞工界方面都唔示弱，據講兩陣營最少有七十五個團體同個人代表要出席公聽會，佢哋一邊一堆口水，搞到個會未開已申請延長至八個鐘，睇嚟負責推呢條法例嘅勞工及福利局局長張建宗想唔頭暈都難喇，今次真係頂唔住都要頂硬上囉！
類似公聽會過去多次出現「鬥人氣」現象，如過去嘅公安法、政改方案等，建制派同泛民都試過鬥法，今次恐怕係今年咁多爭議性草案嘅第一擊而已。截至前日，公聽會已收到過百個團體同個人要求表達意見，約三分一為工商界或資方組織，除咗中總、工總同僱主聯會等「鐵腳」商會，商界唔少團體仲分拆陣營添。少數明確反對立法嘅獅子山學會，今次亦學咗建制派嗰套，除咗學會本身會派代表出席公聽會，另外最少有四名研究員以個人身份報咗名出席。