小白觀點 上咗神枱手尾長
民政事務局失驚無神忽然玩保育,揀咗長洲太平清醮、大澳端午遊涌、大坑舞火龍同盂蘭勝會申請為第三批國家級非物質文化遺產。保育唔係話唔好,不過小白老弟唔係好贊成求求其其搵啲嘢嚟申遺,如果呢幾項傳統文化活動可以上到神枱,咁就手尾長喇。
環保署成日冇嘢攞嘢嚟做,如果大坑舞火龍真係成功申遺嘅話,又話要環保,又話要顧及公眾安全,成條火龍插滿晒電子香,你話幾掃興呢。況且依家啲口靚仔,只係知道得露暈娜呢個非物質文化遺產,一聽見申遺,即刻笑口淫淫,話佢哋長夜漫漫,攬住女神人形咕,經常都遺一遺啦,有乜咁大不了值得要隆重其事啫?
網友觀點...X)...
[ 古 sir ]
哈,唔知近日大熱嘅o靚模文化可唔可以申遺呢可?
[ 飛 兒 ]
唓,政府得把口,呢啲傳統民間活動都係靠班有心人撐落去,申遺成功就攞晒彩,唔得就行轉背,靠政府真係嘥氣!
[ 小 丁 ]
索K港都係香港特色之一喎,拎去申遺唔知得唔得呢?
[ 龍 王 ]
講真,呢啲活動都同以前唔同咗啦,太平清醮都變咗搶膠包,再遲吓可能變舞膠龍都未定。
網址:www.sunsiupak.blogspot.com
阿豪觀點 難敵政府崇洋心態
最近有消息指政府有意將大坑舞火龍活動申遺,以為呢項傳統可以繼續發揚光大啦,點知有舞火龍搞手喊咁口,話原來一直以嚟港府都闊佬懶理,加上又唔夠男丁參與,再係咁落去,「火龍」遲早好似「恐龍」咁絕種。
咁又係呀,你睇吓粵劇吖,夠成功申遺啦,啲老倌咪一樣呻,叫政府唔好淨係將資源放晒喺發展管弦樂同芭蕾舞,應該好好珍惜粵劇呢種本土文化啦!哈哈,要特區政府唔崇洋媚外睇怕難啲囉,大家睇吓活化北九龍裁判法院呢單嘢就知啦,寧願交畀名不見經傳嘅美國機構都唔畀八和會館。非物質文化遺產咋喎,你估政府真係會好似爭奪富豪遺產咁落力咩!
網友觀點...X)...
[ Johnson Lo ]
喂,咪住先,到底申遺係咪咁有用呀?涼茶夠話申遺啦,夠話每年銷量勁過可樂啦,咁又點先?
[ 中 秋 ]
將絕頂污糟嘅中國人廁所列入文化遺產,既有特色又可提醒旅客!
[ 牙擦蘇 ]
申遺成功嘅仲有粵劇呀,所以我哋廣東人都好有文化㗎,千祈唔好妄自菲薄。
[ 貴 人 ]
既然申遺成功,咁唔爭在申埋奧啦,香港一定duck,yeah!
網址:www.lukchiho.blogspot.com
發表方法
讀者如對本欄每日話題有任何意見,歡迎登入網址發表意見。本報保留採用刊登權利,不另通知,敬請留意。