尋日場決賽高手雲集，共有九隊分別來自日本、北京、菲律賓、台灣同香港隊決一高下，Thomas本來同朋友組隊參賽，更秘密苦練兩個月，每星期操練至少兩日，可惜對手技高一籌，喺早輪賽事中已被淘汰出局。

Thomas坦言佢嗰隊表現得比預期中差，惟有企埋溜冰場邊做觀眾，但佢睇得好肉緊，恨不得自己落場打埋一份咁。總決賽最後由北京隊勝出，該隊有兩位英姿颯爽嘅女球員，真係巾幗不讓鬚眉。雖然無份落場打，不過頒獎一刻，Thomas換上一身冰球運動員裝束，同贊助比賽嘅嘉賓齊齊頒獎，戥人高興一樣開心。