新世界挑戰立法會權力及特權法嘅官司，依家仲等緊法官作出判決。尋日喺沙田馬場見到代表新世界一方嘅資深大律師施偉賢，佢講開單官司時笑言：「打官司好似賽馬咁，要跑過先知……不過我都有信心。」
呢位前立法局主席將官司比作賽馬，可能內有玄機，因為尋日佢同朋友合資買嘅「確叻迅」喺第九場跑出，令佢可一嘗拉頭馬嘅滋味。睇番「確叻迅」嘅往績，經常跑三至五名，但施偉賢尋日就好有信心咁話「確叻迅」跑出係意料中事，因為佢覺得愛駒近嚟操到好Fit。
講開新世界律師團陣容，施偉賢直言做咗大律師咁多年，己方律師團成員之間都未必好熟悉，所以一定要落場跑過先知強弱喎。
佢咁刻意用賽馬比喻官司，唔通係要話畀大家知，新世界一方同「確叻迅」一樣狀態大勇，勝券在握？