21/09/2009

播放本新聞相關短片

政情:三太膺院士賭王鼓勵多行善

加拿大特許管理學院暨林肯大學尋日舉行院士及榮譽資格頒授典禮,三十三個獲頒授榮譽嘅傑出人士包括賭王何鴻燊三太陳婉珍。雖然賭王唔能夠去捧場,賀三太獲頒授管理學院榮譽院士,但三太一對龍鳳胎超蓮同猷啟就有嚟觀禮。

三太話當賭王知佢獲頒榮譽院士銜後好開心,仲鼓勵佢以後多做善事,攞多幾個博士。佢笑言賭王依家除做物理治療外,仲會睇電視同叫屋企人讀八卦新聞佢聽,醫生仲批准賭王中秋可以食少少月餅應節添。之前有傳賭王病情穩定後,會由港安醫院轉去睇開嘅養和醫院休養,但三太話暫時都未有呢個打算。另外,有指賭王會喺今日動手術,二太藍瓊纓尋日探病時回應說:「啲人亂寫啫。」

超蓮原本尋日要返英國開學,但佢寧願改搭夜機都要見證媽咪獲頒榮譽院士銜嘅一刻,佢仲教定媽咪用視像會議,等佢遠在英國都可以陪爸爸傾偈。超蓮之後仲大爆爸爸就算住院都不改風趣本色:「佢成日調戲啲姑娘,仲話好開心有咁多女人圍住佢。」